O PORCO DE PÉ (2022)

O PORCO DE PÉ: Teatro de fenómenos

O Porco, o animal totémico dos cocidos e dos entroidos, toma os teatros para demostrar a sua superioridade sobre os seres humanos. O que presenta Excéntricas é un teatro de barracón, aquel que, na infancia, nos fascinaba e nos asustaba a partes iguais. Un farol mortizo, un chan de serrín, unha cortina vermella e, de súpeto, aparece o porco en elegante pose de equilibrista a sosterse sobre os pés, a finxirse un ser humano con tanta graza, que resulta imposible distinguilo.

Vai para cen anos, Vicente Risco detectou unha nutrida presenza porcina vestida con elegantes abrigos e chapéus a confundirse cos propios burgueses. Descobreu que estaban entre NÓS! A divertidísima sátira do ourensán, a medio camiño entre o circo, o barracón, os fantoches e o cabarete, ten hoxe mais vixencia que nunca. Nesta viaxe á fascinante década do 20 do século XX, pasarán, como nunha linterna máxica, anarquistas, capitalistas, agraristas, proxenetistas, golpistas, vangardistas, caciquistas, cupletistas, mentalistas, futuristas, e budistas.

Producións Teatrais Excéntricas inventa, para reinventar este retrato de NÓS, un teatro de fenómenos cheo de monstros de barracón. Unha sucesión de grotescos personaxes, caricaturescos como marionetas, representan dende os principios da farsa popular, a aguda visión do míope Risco. Unha historia de corrupción política e de amor, pasada polos espellos deformantes do parque de atracción.

A estrea mundial d’ O PORCO DE PÉ foi o 31 de marzo de 2022 no Teatro Principal de Ourense. En menos dunha semana, cerca de 2.000 persoas aplaudiron o esforzo dos artistas, maravillados da capacidade de transformación e multiplicación que exiben. Ao final, só saen três a agradecer os aplausos, mais polo escenario pasaron Madame Blavatski, o Elocuente Pregoeiro, o Porco Celidonio, Baldomero García, o Alfaite Nogueira, Dona Nicasia, O Doutor Alveiros, os cabezas parlantes Outeiriño e Forcadela, o Advogado Barbeito, Lolita Piné, os Siameses de Ventosela, Suso e Clodomiro, o Conde, a Venus Victrix, as Criaturas Soñadas (o Anarquista, a Porca Vingativa, o Niilista, a Fascistoide, o Matachin Bolchevique) a Tenista Celidonia, Miguel Primo de Rivera, a Muller-Araña, o Demo e xentes que van á homenaxe a Don Celidonio.

O Caleidoscopio de Risco pasado polo Barracón de Excéntricas!

Espectáculo gañador de 3 Premios de Teatro María Casares a Mellor Actor Secundario (Evaristo Calvo), Mellor Adaptación (Quico Cadaval e Pepe Sendón) e Mellor Escenografía (Carlos Alonso). Gañador de un Premio Maruxa Villanueva (Patricia Vázquez) e finalista nos Max na categoría de Mellor Actriz Protagonista (Patricia Vázquez).

EQUIPA ARTÍSTICA E TÉCNICA

ELENCO

Patricia Vázquez

Victor Mosqueira

Evaristo Calvo

ESCENOGRAFIA E VESTIARIO

Carlos Alonso

ILUMINACIÓN

Octavio Mas

BANDA SONORA

Piti Sanz (coa colaboración de Ro Muñoz e Adrián Arias)

DESEÑO GRAFICO

Javier de la Rosa – Milicia Gráfica

MAQUINARIA E SON

Pepe Quintela

FOTOGRAFÍA

Sabela Eiriz

VÍDEO

Natasha Lelenco

UNIDADE DIDÁCTICA

Fundación Vicente Risco

XEFE DE PRODUCIÓN

Rubén G. Pedrero

AXUDANTE DE DIRECCIÓN

Pepe Sendón

AUTORÍA

Vicente Risco

DRAMATURXIA

Pepe Sendón e Quico Cadaval

DIRECCIÓN

Quico Cadaval

TRAILER DE O PORCO DE PÉ

Material de Difusión e Promoción dispoñible para descarga premando no enlace.